Eph 6 | MHL | STEP | Aria ni muuka wiipa Mua Maneka kema suuwap niena neene niawi opora wia miimeka. Ni sira nain onowa-ke ikua.

Ephesians 6

Wi auwa aite ne muuka wiipa

1 Aria ni muuka wiipa Mua Maneka kema suuwap niena neene niawi opora wia miimeka. Ni sira nain onowa-ke ikua. 2 Mua Maneka sira Moses maakeya wuomakek nain opora feenap maek,

“Nena niawi ne neene tepak-pa wiar ikok wi opora wia miime.”
(Lo 5.16)

3 Nain maep opor eliwa feenap maep koonowak,

“Naap oninan-na no uuwowa wueliwa nefar ikiweya no eliw epa maala miiwa-pa ikainan,”
naap maek. 4 Ne ni auwa, niena muuka wiipa anane wia amukarow opora me wieka, oko wi kema bagiaw irikuan. Baliwep wia kakenami yiena Maneka opora wia maakem-ikeka.

Wi uuwow mua ne wi woos mua wia maek

5 Ni uuwow mua sesa marew uuwiman nain niena woos mua ekima wia opap opora wia miimeka. “Yo Krais naep uuwiyem,” naap maemi uuwowa baliwep onowa kemaiw ikeka. 6 Oko wi mamaiya-pa niar ikaiwkin wia peeskimemi baliwep uuwowen. Weetak, ni naap me oneka. Feenap kema suuweka, “Yo Krais uuwow mua wiar ikem,” naep niena uroma kema Mua Maneka kookalowa wiar ookami uuwam-ikeka. 7 Ni me wi mua muutiw wiar uuwiman, weetak. Yiena Maneka wiar uuwimik naemi palanep uuwam-ikeka. 8 Ni fain amisareman, mua sira eliwa oniya nain ikoka yiena Maneka-ke kiripominon. Ni mua sesa marew uuwiman nain, ni woos mua pun, unow onaiya nia kiripominon.

9 Aria ni woos mua pun naap, mua eena sesa marew niar uuwimik nain balisow wia wueka. Me wia keker opowoweka. Yiena Maneka kema suuweka, o eena owow iinan-pa ikua nain niena Maneka-ke ne wis pun wiena Maneka-ke. Mua wia urufap wia rookasowa marew, mua unowiya iiwawun epaskun wia naiya.

Wi Kristen irakow mua saarik ikemik

10 Aria yo aakisa opora silewami feenap nia maakiyem, ni yiena Maneka wameiya ikeman, naeya o kekanowa-pa kekanowa aaweka. 11 Ni Mua Maneka ona kekanowa-pa nia asipiya nain irakow maa bala saarik iiwawun wiar suuwap ikeka. Naeya ni naap kekanep Satan eena nia peeskimiya nain wiar mika-fienowen. 12 Moram i me wi miiw mua wiamiya irakowa-ke, weetak. Wi aaperek inasina, wi ewar samora, ne wi miiw inasina wiamiya irakowa-ke ikua. Wi nain-ke epa ifemakep kokoma iwep-puamik. Ne wi ewar samo-samora iinan-pa ikemik nain pun wiamiya irakiyen. 13 Naapeya ni Mua Maneka irakow maa bala mia-pa wiar suuwap ikeka. Naeya Satan teeria iiwua purupiwkin epa neeke ni kekanep irakowen. Ne irakep wia nomakep kekanep naap ikowen. 14 Naapeya ni kekanep Mua Maneka opor makena inakirowa saarik urom ara-pa kaikap, sira makena tapi saarik wueka. 15 Ne Mua Maneka opor eliwa wia maakowa topialem-ikowa nain kepur suuwowa saarik suuweka, eena kema sonom eliwa wiowa nain. 16 Ne Yeesus opora opowa nain niena umua-ke naiyem. Nain opap Satan wiowa mukun onaiya nia nomomiya nain eliw wiar mika-fienowen. 17 Ni Mua Maneka iiriw nia aawok nain kema suuweka. Nain tapala kekanowa saarik wueka. Ne Ewar Eliwa bainat wiar opaka, bainat nain Mua Maneka opora-ke. 18 Ne Ewar Eliwa kekanowa-pa anane Mua Maneka farem-ikeka. Kekanep maa mauwa kema-pa niar ikua nain o farowa me piipueka, anane naap farem-ikaiwkin ona teeria unowa wia asipinok.

19 Neemi yos pun Mua Maneka efa asipowa nain farem-ikeka, naeya ona efa asipami opora yieya yo keker opow marew opor eliwa kemena fookap baliwep wia maakem-ikainen. 20 Mua Maneka ona nain naep efa sesekak, ne onoma neeke yo koora-pa efa wuamik. Nain yo uuwowa me piipuam, fan uuwam-ikaiyem. Naapeya ni Mua Maneka fariwkin yo efa kekanowinok. Naeya yo keker opowa marew kekanep opor eliwa naap wia maakem-ikainen.

Pol Mua Maneka nokarek, wi wia asipinok naep

21 Aria yo Tikikus nan sesekiyem, ikoka os-ke yo kamenap ikem nain, ne uuwowa kamenap oniyem nain nia maakinon. O yiena uuwow epaskun-ke ne pun yiena Maneka uuwow mua eliwa-ke. 22 Yo feenap naep ni niar sesekiyem, i aakisa uuwowa kamenap ikemik nain os-ke amisa niemi nia kekanowinon. 23 Kema sonom eliwa, wia kookalowa ne kekanep ikowa, nain Auwa Mua Maneka ne yiena Maneka Yeesus Krais ikos niimik. 24 Ni yiena Maneka Yeesus Krais manek akena kookalowiw ikaiman, Mua Maneka-ke nia saliwami nia asipam-ikainok.